မြို့အမည်ဖြင့် ကျင်းပသည့် ဘားကမ့်

ဘားကမ့် ဆိုသည်
ဘားကမ့်ဆိုသည်မှာ ပညာရပ်ပိုင်းဆိုင်ရာနှင့်ပတ်သက်၍ ‌တွေ့ဆုံသော တွေ့ဆုံပွဲတစ်ခု ဖြစ်သည်။ ‌တွေ့ဆုံပွဲပုံစံသည် သမားရိုးကျ ပွဲကျင်းပပုံ‌များနှင့် မတူပဲ ဝါသနာ၊ ရည်မှန်းချက် တူညီသူများ စုစည်း၍ အ‌တွေ့အကြုံ၊ အသိပညာ‌များအား ဖလှယ်ကြသည့် ပုံစံမျိုးဖြစ်သည်။ ပုံမှန်လုပ်‌နေကျ နည်းပညာ‌ ဟော‌ပြောပွဲ‌များ၊ အလုပ်ရုံ‌ဆွေး‌နွေးပွဲ‌များ ပြုလုပ်သကဲ့သို့ နည်းပညာများအား သရုပ်‌ဖော်ပြသခြင်း သက်သက်မဟုတ်ပါ။ အ‌ကြောင်းအရာတစ်ခုအား ဦးတည်‌ဆွေး‌နွေးသော ကွန်ဖရမ့်(conference) ပုံစံမျိုး လည်း မဟုတ်ပါ။ ဘားကမ့်သို့ တက်‌ရောက်လာသူ‌များ ကိုယ်တိုင် ပူး‌ပေါင်း‌ဆွေး‌နွေး ပါဝင်မျှ‌ဝေနိုင်သော ကွန်ဖရမ့်(user generated conference) တနည်းအားဖြင့် ကွန်ဖရမ့် မဟုတ်သော ပုံစံ (unconference) ဟု ‌ခေါ်ဆိုနိုင်သည်။

Barcamp Logo
Barcamp Logo

ဘားကမ့်သည် တတ်ကျွမ်းသူ‌များက မတတ်ကျွမ်းသူ‌တွေကို သင်ကြား‌ပေးသည့် ပုံစံသို့ မသွား ပါ။ လူတိုင်း၌ ကိုယ်ကျွမ်းကျင်သည့် အ‌ကြောင်းအရာ‌များ၊ တစ်ခြားသူများသို့ အသိပညာ မျှ‌ဝေနိုင်မည့် အပိုင်း‌များ ကိုယ်စီရှိကြသည်ဟု ဘားကမ့်က ယူဆသည်။ ထို့ကြောင့် အပြန်အလှန် အကျိုးသက်‌ရောက်မှု ရှိစေသော(interactive) ‌ဆွေး‌နွေးဖလှယ်မှု ပုံစံမျိုးဖြင့် ဘားကမ့်ကို ကျင်းပသွားလေ့ရှိသည်။ ယင်းကြောင့် နည်းပညာ၊ အသိပညာများအား ဖြန့်ဝေသော ပုံစံသည် သမားရိုးကျပုံစံများမှ ခွဲထွက်သွားခဲ့သည်။ ဘားကမ့်တွင် စည်းကမ်း‌များ၊ အချိန်ကိုက်ပြုလုပ်ရမည့် အစီအစဉ်‌များ မရှိပါ။ အချင်းချင်းမှ တူညီစွာ စိတ်ဝင်စားသော အ‌ကြောင်းအရာများကို ပြောပြ‌ဆွေး‌နွေးနိုင်သည်။ အ‌ကြောင်းအရာ‌များအား လွတ်လွတ်လပ်လပ် ‌ဆွေး‌နွေးဖလှယ်ကြပြီး၊ ‌ပြောဆို‌ဆွေး‌နွေးကြသော ‌ခေါင်းစဉ်များ၏ ဦးတည်ရာအတိုင်း အလိုက်သင့် လိုက်ပါ‌ ဆွေး‌နွေးကြခြင်းဖြစ် ဘားကမ့်များကို ကျင်းပကြသည်။
ဘားကမ့်၏ အနှစ်သာရနှင့်အသက်ဝင်မှုမှာ မိမိကိုယ်တိုင် ပါဝင်‌ဆွေး‌နွေးခြင်း (participation) ဖြစ်သည်။ ဘားကမ့်အား နား‌ထောင်ရုံသက်သက် တက်‌ရောက်ခြင်း မဟုတ်ပဲ ကိုယ်သိချင်သော အ‌ကြောင်းအရာများအတွက်‌ မေးခွန်း‌များ၊ ကိုယ်သိထားသည်များကို ရှင်းပြ၊ ‌ပြောပြနိုင်ရန် ပြင်ဆင်မှု‌များဖြင့် တက်‌ရောက်ရန် လိုအပ်သည်။ ကိုယ်‌မေးလိုက်သည့် ‌မေးခွန်းမှ တစ်ဆင့် အများ‌မှ မစဉ်းစားမိသေးသော အ‌ကြောင်းအရာတစ်ခုကို ‌ဖော်ထုတ်‌ပေး နိုင်သကဲ့သို့ ကိုယ်‌ပေးလိုက်သည့် နည်းလမ်းတစ်ခုသည် တစ်ခြားတစ်‌ယောက်အတွက် တန်ဖိုးရှိပြီး လိုအပ်သော နည်းလမ်းတစ်ခုလည်း ဖြစ်‌နေနိုင်သည်။ ဘားကမ့်၏ သဘာဝသည် ကိုယ်တိုင် သိရှိထားသည့် အချက်များကို ပေး၍ ကိုယ်မသိသော အချက်များကို ရယူနိုင်သည့် သဘာဝလည်းဖြစ်သည်။

ဘားကမ့်အစပိုင်း ကာလာများ
ဘားကမ့်အား အ‌မေရိကန်နိုင်ငံ ကယ်လီဖိုးနီယားမြို့မှာ ၂ဝဝ၅ ခုနှစ် ဩဂုတ်လ ၁၉ ရက်နေ့မှ ၂၁ ရက်‌နေ့အထိ ပထမဆုံးအကြိမ်အဖြစ် စတင်ကျင်းပခဲ့သည်။ ထိုမှ တစ်ဆင့် ‌မြောက် အ‌မေရိက၊ ‌တောင် အ‌မေရိက၊ အာဖရိက၊ ဥ‌ရောပ၊ အ‌ရှေ့အလယ်ပိုင်းနှင့် အာရှနိုင်ငံများတွင် ရှိသည့် နိုင်ငံ‌ပေါင်း ၃၅ဝ ‌ကျော်၌ ကျင်းပနိုင်ခဲ့သည်။ မြန်မာနိုင်ငံ၏ အိမ်နီးချင်းနိုင်ငံများတွင် ရှိသည့် မွန်ဘိုင်း၊ နယူး‌ဒေလီ၊ ဘန်‌ကောက်၊ ဖနွမ်းပင်နှင့် ‌ဘေဂျင်မြို့များတွင်လည်း ကျင်းပနိုင်ခဲ့သည်။

မြို့အမည်ဖြင့် ကျင်းပကြသည့် ဘားကမ့်များ
နိုင်ငံတကာမှာ ပြုလုပ်သော ဘားကမ့်များအား ‌လေ့လာကြည့်သောအခါ နိုင်ငံအမည်များဖြင့် ဘားကမ့်များကို မ‌တွေ့ရပဲ Barcamp London, Barcamp New York City, Barcamp Los Angeles, Barcamp Boston စသဖြင့် မြို့အမည်များကို အစွဲပြု၍ ကျင်းပကြကြောင်း တွေ့ရသည်။ ယင်း သို့ ကျင်းပသည့်အခါ၌လည်း အ‌တွေ့အကြုံရှိသူများက ဝိုင်းဝန်းကူညီ‌ ပေးကြသည်ကို ‌တွေ့ရပြီး ဆိုင်ရာ မြို့ခံများကသာ ဦး‌ဆောင်ကျင်းပလေ့ရှိကြောင်း တွေ့ရသည်။

ပထမဆုံးအကြိမ်အဖြစ် မြန်မာနိုင်ငံ၌ ကျင်းပနိုင်ရန် ကြိုးစားခဲ့သည့် ဘားကမ့်ရန်ကုန် ၂၀၁၀ အကြောင်း ဆောင်းပါးအား ပါစင်နယ်ကွန်ပျူတာမဂ္ဂဇင်းတွင် ၂၀၁၀ ဇန်နဝါရီလက ရေးသားဖော်ပြခဲ့သည်။ ထိုဆောင်းပါးမှ မလိုအပ်သည့် အစိတ်အပိုင်းများအား ပြင်ဆင်၊ ဖြည့်စွက်၊ တည်းဖြတ်၍ ယခု ဆောင်းပါး အား ရေးသားတင်ပြသည်။ ရန်ကုန်နှင့်မန္တလေးမြို့များအပြင် အခြားသော မြို့ကြီး မြို့ငယ် မြို့လေးများ၌ လွပ်လပ်ပေါ့ပါးသည့် နည်းပညာဖလှယ်ပွဲများ ကျင်းပနိုင်ရန်နှင့် နည်းပညာအသုံးပြုမှု ကျယ်ပြန့်လာစေ ရန်လည်း ရည်ရွယ်သောအားဖြင့် ယခုဆောင်းပါးအား တင်ပြအပ်သည်။

ဟန်ဇော်

Please follow and like us:
error0